ശ്രീകണ്ഠപുരം: മയക്കുമരുന്ന് പിടികൂടാനെത്തിയ പൊലീസ് സംഘത്തെ കാറിടിച്ച് കൊലപ്പെടുത്താന്‍ ശ്രമിച്ച കേസില്‍ രണ്ടുപേര്‍ അറസ്റ്റിൽ. ശ്രീകണ്ഠപുരം കണിയാര്‍വയലിലെ മുഹമ്മദ് റാസി (22), പരിപ്പായിലെ പൂവങ്കുളത്ത് മുബീന്‍ (20) എന്നിവരെയാണ് ശ്രീകണ്ഠപുരം എസ്.ഐ പി.പി. പ്രകാശന്‍ അറസ്റ്റ് ചെയ്തത്. മയക്കുമരുന്ന് കടത്തുന്നെന്ന രഹസ്യ വിവരത്തെത്തുടര്‍ന്ന് പിടികൂടാനെത്തിയ ലഹരിവിരുദ്ധ സ്‌ക്വാഡിലെ അംഗങ്ങളായ പൊലീസുകാരെയാണ് ഇവര്‍ ആക്രമിച്ചത്.
ബൈക്കിലെത്തിയ പൊലീസുകാരെ കാറില്‍ വന്ന മുഹമ്മദ് റാസിയും മുബീനും ബോധപൂര്‍വം കാര്‍ ബൈക്കിലിടിച്ച് അപകടത്തില്‍പെടുത്തുകയായിരുന്നു. സംഭവം ചോദ്യംചെയ്യാന്‍ ശ്രമിക്കുന്നതിനിടെ കാര്‍ പിന്നോട്ടെടുത്ത് വീണ്ടും ബൈക്കിലിടിച്ച് പൊലീസുകാരെ കൊല്ലാന്‍ ശ്രമിച്ചുവെന്നാണ് കേസ്.
ശ്രീകണ്ഠപുരം കമ്യൂണിറ്റി ഹാള്‍-അടുക്കം റോഡില്‍വെച്ചായിരുന്നു സംഭവം. പിന്നീട് കാറുമായി പ്രതികള്‍ രക്ഷപ്പെട്ടു. പൊലീസ് നടത്തിയ അന്വേഷണത്തില്‍ ഇവര്‍ക്ക് മയക്കുമരുന്ന് വിൽപനക്കാരുമായി ബന്ധമുണ്ടെന്ന സൂചനയും ലഭിച്ചു. പ്രതികളെ കോടതി റിമാൻഡ് ചെയ്തു.