തലശ്ശേരി: വടകര ലോക്‌സഭ മണ്ഡലം യു.ഡി.എഫ് സ്ഥാനാര്‍ഥി ഷാഫി പറമ്പിലിന് തലശ്ശേരിയിൽ ഊഷ്മള സ്വീകരണം. ശനിയാഴ്ച വൈകീട്ട് സ്റ്റേഡിയം കോര്‍ണറില്‍നിന്ന് നിരവധി നേതാക്കളും പ്രവര്‍ത്തകരും ചേർന്ന് ബാൻഡ് മേളത്തിന്റെ അകമ്പടിയോടെ സ്ഥാനാർഥിയെ നഗരത്തിലൂടെ ആനയിച്ചു. പ്രകടനം കാണാൻ റോഡിന് ഇരുവശവും കൂടിനിന്ന കുട്ടികൾ ഉൾപ്പെടെയുള്ളവർ സ്ഥാനാർഥിക്ക് അഭിവാദ്യമർപ്പിച്ചു. യു.ഡി.എഫ് തലശ്ശേരി നിയോജകമണ്ഡലം തെരഞ്ഞെടുപ്പ് കണ്‍വെന്‍ഷന്‍ കെ.പി.സി.സി വൈസ് പ്രസിഡന്റ് വി.ടി. ബൽറാം ഉദ്ഘാടനം ചെയ്തു.
ഇന്ത്യ വിജയിക്കണമെങ്കില്‍ ജനാധിപത്യ ചേരി വിജയിക്കണമെന്ന് സ്ഥാനാർഥി ഷാഫി പറമ്പില്‍ പറഞ്ഞു. വർഗീയ ഫാഷിസ്റ്റ് ശക്തികളില്‍നിന്നും ഇന്ത്യയെ വീണ്ടെടുക്കണമെങ്കില്‍ നാം ഒറ്റക്കെട്ടായി നില്‍ക്കണം. പല കള്ളത്തരങ്ങളും പ്രചരിപ്പിക്കുകയാണ് കേന്ദ്ര-കേരള സര്‍ക്കാറുകള്‍. അതോടൊപ്പം നാട് ഭരിക്കുന്ന മുഖ്യമന്ത്രിയും പച്ചക്കള്ളം പ്രചരിപ്പിക്കുകയാണെന്നും ഷാഫി കുറ്റപ്പെടുത്തി.